الأربعاء، 19 نوفمبر 2008

حوار مع نفسي

دخلت المدونة النهاردة، بابص على آخر تدوينة لقيتها من شهر فبراير.. يعني 9 شهور.. ليه كده؟ للدرجة دي مش لاقية وقت اكتب؟ طيب مشغولة في ايه؟ على طول مشغولة و مش فاضية.. مشغولة في ايه و مش فاضية لإيه؟ يعني من الآخر إعادة ترتيب أولويات.

قررت اني ابقى انا مش انا.. أسيب نفسي تحت و اطلع أبص عليها من فوق.. بتعملي ايه في حياتك ياللي اسمك علا انتي؟ ايه بتعمليه يوافق هوى نفسك و ايه بتعمليه عشان لازم تعمليه؟ و ايه اللي وصلك انك ممكن تفضلي شهور تعملي الحاجة اللي حاسة انك عايزة تعمليها بس؟ و مين قاللك ان الحياة هاتمشي على طول كده؟ ايه؟ اتفاجئتي لما جبتي عربية و ابتديتي تسوقي و لقيتي نفسك كارهة السواقة بس لازم تسوقي؟ خضتك اوي كلمة لازم؟ مش متعودة انك تبقي ملتزمة بحاجة أو مسئولة مسئولية كاملة عن حاجة؟ عشان كده بأه معظم وقتك اللي بعد الشغل بتتعمدي انك تقضيه في الحاجة اللي انتي عايزة تقضيه فيها و بس؟ فين يا هانم القراءة في يومك؟ فين الكتب اللي شلتيها على قلبك من معرض الكتاب أول السنة دي؟ آدي معرض الكتاب قرب و انتي يا فالحة قريتي كام صفحة من كل كتاب و ركنتيهم.. فين الوقت اللي المفروض يكون لربك؟ آه طبعا هاتقوليلي ان كل الأعمال الخيرية اللي انتي مطحونة فيهم دول لوجه الله.. ماشي ما اختلفناش، بس عايزة تفهميني انك كل مرة بتعملي حاجة للجهات الخيرية دي بتجددي نيتك لله؟ و لا فيه منهم بتنزلي عشان الدنيا حلوة مع الناس دي؟ ايه؟ كلامي قاسي؟ معلش، بس لازم كل شئ يبقى محدد عشان نعرف هانروح فين و هانمشي من أنهي سكة.. ماهو لازم يكون فيه سكة ما ينفعش نمشي في طريق مش عارفين آخرته ايه.. ما ينفعش نعيش اليوم بيومه.. ما ينفعش حال أيامنا يبقى زي حال السواقة في القاهرة، عبارة عن ملء فراغات و خلاص.

إيه خلصتي كلامك؟ طبعا الكلام عمره ما هايخلص بس متهيألي خلص وقت الكلام و جه وقت الفعل.. ابدأي قولي لنفسك لأ.. لأ لصغائر الملهيات عن الأهداف.. عشان كده ابدأي يا هانم حطي لنفسك أهداف.. إلزمي نفسك بمسؤوليات و كوني أدها.. جددي نيتك في عمل الخير و أوعي يتحول لعادة.. إخلقي وقت للقراية و لورد القرآن كل يوم.. هاتجيبي وقت منين معرفش، بس اتصرفي و نظمي نفسك و حياتك و ارجعي علا بتاعة 3 سنين فاتوا.. و لا الغربال الجديد له شدة يا أستاذة؟

خلص كلامي مع نفسي.. يا رب يعيني أكون حد تاني غيري.. مش عاجباني خالص السنة اللي عدت دي.. حتى و لو سني لسه مش 70 سنة.. برضه مافيش وقت كتير فاضل عشان نضيع سنة من عمرنا من غير ما نلاقي نفسنا حققنا حاجة أو بقينا أحسن.. هو العمر فيه كام سنة؟

هناك 5 تعليقات:

أحمد المسلم يقول...

السلام عليكم ورحمة الله وبركاته .

أحسنت ، فليس في العمر الكثير لنضيعه ، ويجب علينا دائما أن نراجع أنفسنا ، وننطلق إلى أهدافنا دون الانتباه لمشتتات الأهداف .

أسأل الله أن يعينك على ما ترغبين من خير ، والسلام ختام .

eldoctor يقول...

تعرفى عندى حالة اكتئاب شديدة جدا . كلما ازددت وعيا و فهما لما يحدث فى دنيانا كلما احسست بعظمة الله و جلاله و كلما ابحرت فى هذه الدنيا كلما ازددت اقتناعا اننا فى اخر الزمان .. زمان الفتن . بداخلى الكثير مما اكتبه و لكن لمن ؟؟؟؟؟؟؟؟ الكل يتكلم و قل من يسمع ؟.. و نن بحاجة ان نسمع ممن يستحق ان يتكلم....

Jazzy Life يقول...

sweetie it's not the years in your life

it is the life in your years :)

mahasen saber يقول...

كل عيد وانتى بالف خير
واسرتك وكل من تحبين بكل صحه وستر

Salolo يقول...

كلام جميل والمدونة رائعة باقى انك توظبى على موضوع الكتابة ... تحياتى

<