السبت، 3 نوفمبر 2007

سنة تدوين

لما قريت البوست بتاع عصفور المدينة عن انه تم عام من التدوين جه في بالي اني أشوف انا كمان بدأت تدوين امتى.. و كانت المفاجأة و هي اني بدأت تدوين قبله بيوم واحد بس، يعني يوم 1 نوفمبر.. ياااااااه.. بقالي سنة بادون يا بشررررررر

طبعا اللي هايدخل هنا هايقول يا نصااااااااابة... فين السنة التدوين دي و انتي أول تدوينة كانت شهر ديسمبر اللي فات.. بس اللي يعرفني هايعرف اني بدأت تدوين في وشوشاتي الأولانية و هي دي اللي فيها معظم تدويناتي و يمكن أهمها بالنسبة لي و هي سلسلة عشر سنوات من الحياة الوظيفية و من ديسمبر الماضي و انا باكتب شوية هنا في البلوج سبوت و شوية هناك في ايجي بلوج، و بقالي كان شهر باكتب هنا و احط نسخة هناك.. برضه ايجي بلوج كانت بدايتي و عزيزة على قلبي :)

عارفة.. عارفة اني مدونتي مافيهاش الشغل الجامد اللي كتير من المدونين عاملينه من صور و جرافيك و تغيير في القالب و حاجات كده، انما يمكن انا باعتمد اكتر على الكلام المكتوب في التدوينة.. آه طبعا ده قصر ديل عشان مش عارفة بتجيبوا الصور التحفة المعبرة عن الموضوع دي منين، بس آديني على الأقل باكتب كلام بيلقى قبول من البعض.

طبعا مش هاقدر اقول بقلب جامد اني بقالي عام كامل بادون زي الأستاذ عصفور المدينة مثلا عشان يعني مقلة شويتين في انتاجي التدويني، انما آديني اهوه برضه على طريق التدوين و يا رب يتقبل ما كان لوجهه في السنة الماضية و يعفو عما كان لهوى في نفسي.

كل سنة و انتوا طيبين

<