شفت الكروان

نازلة امبارح الصبح رايحة الشغل.. طلعت ع الشارع الرئيسي اللي بيطلع على الكورنيش عشان أركب.. سمعت صوت الكروان بيشدو.. عادي.. بس اللي مش عادي هو اني كنت سامعاه قريب اوي.. اكتر مرة سمعت صوته فيها قريب كده.. قلت يبقى اكيد هو قريب مني اوي.. اتلفت حواليا.. بصيت ع الشجر.. مش لاقياه.. مش شايفاه.. كل ده و انا ماشية.. و لما قربت على شارع الكورنيش و قبل ما أعدي الشارع سمعت صوته أقرب و أقرب.. بابص على يميني شفته.. لقيته.. واقف على قمة مبنى تقريبا كده قيمة 4 أدوار.. واقف و بيشدو بأعذب الألحان.. دعاء الكروان

كان نفسي أطلع الموبيل بتاعي و أصوره.. من زمان كان نفسي أشوفه.. طول عمري باسمعه، انما عمري ما شفته.. وقفت شوية ابص عليه.. تاني كان نفسي أصوره.. أصلي مش كل يوم هاشوف كروان.. كنت عايزة فعلا أصوره.. انما اتكسفت أطلع الموبايل في الشارع و اقف أصور.. خفت لا حد يخطف مني الموبيل؟ اصل الدنيا كانت الصبح بدري اوي و مافيش حد بيعدي غير العمال اللي بيشتغلوا في المكان ده.. كمان كنت مستعجلة عشان اروح الشغل.. انتزعت نفسي من المسمرة في الشارع.. عديت شارع الكورنيش.. اول ما عديت بصيت عليه.. شاورت لتاكسي و للأسف أول تاكسي أشاور له و اقول له المهندسين يقوم يوافق على طول.. طيب ما هو انا ساعات باقف بالربع ساعة و ماحدش بيعبرني

ركبت التاكسي و عيني عليه.. دخلت التاكسي و اول ما قعدت رحت لاوحة رقبتي ورا بابعص عليه.. فضلت باصة عليه لحد و رقبتي ملووحة لحد ما غاب.. غاب.. غاب في الزحام.. في الزحام.. في الزحام.. مخلفا وراءه الجريدة وحيدة......... ايه ده؟ ده انا كده دخلت على أغنية ماجدة الرومي

و بعد اللوحة المميتة دي و بعد ما غاب عن عيني الكروان لفيت رقبتي و بابص قدامي لقيت السواق بيبص لي في المراية بمنتهى الاذبهلال.. مالها دي؟

طبعا فضلت بعدها شوية مبسوطة.. شفت الكروان..
ربنا اختارني انا في هذا الصباح عشان أشوف الكروان..
طول عمري كنت باتخيل يا ترى الصوت ده طالع من طائر شكله ايه؟
و أخيرا شفته.. شفت الكروان
طيب يا ترى دي رسالة؟ هدية؟ أمارة عن حاجة معينة؟
مش عارفة
بس كل اللي عارفاه اني منشرحة الصدر من امبارح و كل ما اقابل حد أقول له: مش انا شفت الكروان؟