سؤال برئ بمناسبة ذكرى ثورة يوليو

هي الثورة بالطريقة اللي قامت بيها دي يبقى اسمها ثورة؟ و لا اسمه انقلاب عسكري او انقلاب الجيش على الحاكم و قلب نظام الحكم و تحويله من ملكي لجمهوري؟

أصل انا أفهم ان الثورة دي خاصة بالشعب.. زي الثورة الفرنسية اللي قام بيها الشعب الفرنسي.. أو ثورة الشعب ضد المستعمر زي ثورة القاهرة الأولى و الثانية ضد الاحتلال الفرنسي و ثورة 1919 ضد الاحتلال الانجليزي.. انما اللي حصل سنة 1952 ده يتسمى ثورة ليه؟

عموما انا طرحت السؤال ده على رواد قهوة كتكوت و كان المردود إلى حد كبير إيجابي.. يعني مش انا بس اللي باسأل السؤال ده.

أحــــزان يــومــيــة

محل فول و طعمية على ناصية شارعنا..

كل يوم و انا نازلة الصبح ألاقي الراجل و مراته قاعدين بيشربوا الشاي على ما زيت القلي يسخن..

كل يوم أصبح على الست.. صباح الخير.. صباح الخير..

ساعات كانت تهز لي راسها و ساعات كانت تشاور لي و كيابة الشاي في إيدها..

عمر ما حصل بيني وبينها حوار غير صباح الخير صباح النور

في يوم نزلت الصبح.. نزلت.. لأول مرة اشوف المحل مقفو.. و ورقة متعلقة ع الباب..

ماقريتش الورقة.. قلت اكيد حد من قرايبهم توفى.. أبوها.. أمها.. ابوه او أمه..

تاني يوم برضه المحل قافل..

تالت يوم برضه قافل..

رابع يوم المحل فاتح.. انما الراجل قاعد لوحده..

معدية ع المحل زي كل يوم و في عينية سؤال.. امال فين مراتك؟

تاني يوم عديت.. برضه قاعد من غيرها و حد جنبه بيواسيه..

أخيرا فهمت.. مع ان الموضوع واضح من الأول.. انما ما كانتش عايزة أفهم.. ما كنتش عايزة أصدق..

الله يرحمك يا فلانة.. حتى ماعرفش اسمها..

كل يوم و انا نازلة الصبح أشوفه قاعد لوحده.. سارح في اللا شئ او باصص في الأرض..

مرة في إيده كباية الشاي و مرات لأ..

كل يوم.. كل يوم.. كل يوم لما باشوفه من غيرها بااكتئب..

أد ايه فقد الرفيق صعب و مؤلم..

يا رب صبر كل على ابتلائه.